Newidiadau Cadarnhaol Wrth i Grŵp Agrisgôp Ganolbwyntio ar Gefnogi Lles Ffermwyr

Trwy gyfuniad o drafodaeth gyda chymheiriaid, gweithgareddau ymarferol a mewnbwn arbenigol, rhannodd aelodau’r grŵp brofiadau personol a nodwyd straenachoswyr cyffredin. Wrth wneud hynny, datblygwyd strategaethau ymdopi megis gwella rhyngweithiad cymdeithasol, gweithgaredd corfforol a mabwysiadu meddylfryd cadarnhaol.

Dywed Rhian Jones “Fe wnaeth y grŵp weithio’n dda gyda’i gilydd i gynorthwyo ac annog newid. Credaf fod clywed gan ei gilydd ac arbenigwyr y diwydiant wedi rhoi cipolwg gwerthfawr i aelodau’r grŵp i’r hyn sy’n gwella iechyd meddwl unigolyn.”

Dywed un aelod o’r grŵp, Ffion Hooson, sydd â fferm dda byw gymysg ei bod yn “cael pethau’n llethol ar adegau” cyn ymuno â’r grŵp, gan ychwanegu y gall ffermio fod yn “anodd yn feddyliol, gydag oriau hir, pwysau ariannol a’r cyfrifoldeb parhaus sy’n dod law yn llaw â gofalu am dda byw. Gall hefyd fod yn eithaf unig, yn enwedig pan rydych yn gwneud rhan fwyaf o’r gwaith ar eich pen eich hun.”

Cymerodd y grŵp ran mewn ystod o weithgareddau ymarferol, gan gynnwys ymweld â menter ffitrwydd ar y fferm, rhoi cynnig ar dechnegau meddylgarwch ac edrych ar rôl diet, hydradiad a newidiadau i ffordd o fyw wrth gefnogi lles. Darparodd y siaradwyr gwadd cipolwg ar wytnwch, newid ymddygiad, cwnsela ac ymwybyddiaeth o iechyd meddwl yn ogystal ag arweiniad ar adnabod arwyddion o iechyd meddwl gwael a chynorthwyo eraill.

Bu i aelodau fyfyrio ar eu hymddygiad eu hunain, pennu pwyntiau gweithredu personol ac arbrofi gyda dulliau newydd megis sesiynau yn y gampfa, ioga a gwell maeth drwy gydol y rhaglen. Un o’r newidiadau mwyaf arwyddocaol i Ffion oedd ymuno â’r gampfa ar ôl cydnabod bod angen rhywbeth y tu allan i’r fferm arni iddi hi ei hun.

“Roedd ymuno â’r gampfa yn teimlo fel cam cadarnhaol tuag at wella fy iechyd corfforol a fy iechyd meddwl. Mae ymarfer corff wedi rhoi ffordd i mi glirio fy mhen a symud i ffwrdd o bwysau dydd i ddydd ffermio, hyd yn oed os yw am gyfnod byr yn unig. Rwy’n teimlo’n gryfach yn gorfforol ac mae gennyf fwy o egni ac mae wedi rhoi hwb i fy hyder a fy hwyliau”.

Mae’r grŵp hefyd wedi datblygu sgiliau gwrando, holi ac agor sgyrsiau, gan helpu i feithrin hyder wrth drafod iechyd meddwl. Gan fyfyrio ar werth y grŵp, dywed Ffion “fe wnaeth gallu siarad yn agored ag eraill sy’n wynebu’r un heriau fy helpu i sylwi nad oeddwn ar ben fy hun a bod eraill yn teimlo’r un fath”. Ychwanegodd bod yr amgylchedd cefnogol wedi annog aelodau i rannu profiadau a chymryd camau bach cadarnhaol i wella eu lles.

Yn gyffredinol, cyfunodd y grŵp sgiliau dysgu ar y cyd gyda chamau ymarferol i helpu aelodau i ddeall a rheoli eu hiechyd meddwl eu hunain yn well, wrth gryfhau eu gallu i gynorthwyo eraill yn y gymuned amaeth.

Gan edrych yn ôl ar ei phrofiad, dywed Ffion ei bod nawr yn “teimlo’n fwy cadarnhaol ac yn fwy ymwybodol o bwysigrwydd gofalu am fy lles fy hunain. Mae cymryd y camau bach hynny – ymuno â’r grŵp, siarad yn fwy gonest a gwneud amser ar gyfer ymarfer corff wedi fy helpu i deimlo bod gennyf fwy o gydbwysedd  a fy mod yn gallu ymdrin â’r heriau sy’n dod law yn llaw â ffermio.”

Cred bod gofalu am eich iechyd meddwl yr un mor bwysig â gofalu am y fferm a gall newidiadau bach neu estyn allan i eraill wneud gwahaniaeth mawr.

Ychwanegodd Rhian Jones, “Mae’n dda gweld sut mae rhai aelodau’r grŵp wedi gwneud newidiadau cadarnhaol i wella’u hiechyd meddwl ei hunain ers bod yn rhan o Agrisgôp.”

P’un a ydych yn edrych i arallgyfeirio, datgloi potensial menter bresennol neu gysylltu ag eraill i rannu syniadau a phrofiadau, mae Agrisgôp yn cynnig cymorth wedi’i deilwra i’ch nodau. Gyda hwyluso arbenigol, mynediad at siaradwyr arbenigol, ymweliadau astudio a hyfforddi un i un dewisol, mae Agrisgôp yn darparu’r offer a hyder i droi syniadau’n gamau ymarferol.

Os oes gennych ddiddordeb dechrau grŵp Agrisgôp neu ymuno ag un, edrychwch ar gyfeirlyfr Arweinwyr Agrisgôp i ddod o hyd i hwylusydd yn eich ardal. Agrisgôp | Cyswllt Ffermio