Mae menywod ledled Sir Gaerfyrddin sy’n profi perimenopos, menopos neu ôl-menopos yn cael eu gwahodd i ymuno â chyfres newydd o sesiynau cymunedol am ddim, cyfeillgar ac addysgiadol.
Mae’r sesiynau Siarad Menopos newydd yn cael eu cyflwyno drwy bartneriaeth rhwng Bwrdd Iechyd Prifysgol Hywel Dda a Chyngor Sir Caerfyrddin. Bydd y sesiynau pythefnos yn darparu lle croesawgar a chefnogol i gyfranogwyr ddysgu mwy am y menopos, cael mynediad at wybodaeth ymarferol a rhannu profiadau.
Cynhelir y sesiwn nesaf ddydd Mawrth 29 Medi 2026, gyda’r sesiynau’n parhau bob yn ail ddydd Mawrth rhwng 6.30pm ac 8pm yng Nghlwb Rygbi Nantgaredig, SA32 7LQ. Mae’r holl sesiynau yn rhad ac am ddim, gyda the a choffi am ddim ar gael a pharcio am ddim.
Bydd pob sesiwn yn dechrau gyda sgwrs fer sy’n canolbwyntio ar bwnc gwahanol sy’n gysylltiedig â’r menopos, gan gynnwys symptomau, opsiynau triniaeth, maeth, iechyd meddwl, iechyd pelfig, gweithgarwch corfforol a hunan-ofal. Yna bydd cyfranogwyr yn cael cyfle i sgwrsio, ymlacio a chysylltu ag eraill mewn amgylchedd cefnogol.
Dywedodd Kerry Phillips, Arweinydd Clwstwr Tywi Taf ym Mwrdd Iechyd Prifysgol Hywel Dda: “Mae’r menopos yn effeithio ar bawb yn wahanol, a gall cael mynediad at wybodaeth ddibynadwy a chymorth lleol wneud gwahaniaeth gwirioneddol i les a hyder menywod. Bydd y gwasanaeth hwn yn helpu menywod i archwilio’r materion sydd bwysicaf iddyn nhw a theimlo eu bod wedi’u grymuso i wneud dewisiadau gwybodus am eu hiechyd.
“Mae cysylltiadau cymunedol yn hynod bwysig yn ystod cyfnodau o newid, ac mae’r sesiynau hyn wedi’u cynllunio i helpu menywod i deimlo’n llai ynysig wrth iddynt lywio’r cyfnod hwn o fywyd.”
Dywedodd y Cynghorydd Jane Tremlett, Aelod o’r Cabinet yng Nghyngor Sir Caerfyrddin:
“Mae’r sesiynau hyn yn cynnig cyfle i fenywod ddod at ei gilydd, dysgu mwy am bynciau sy’n gysylltiedig â’r menopos a meithrin cysylltiadau ag eraill a allai fod ar gam tebyg yn eu bywydau. Rydym yn gobeithio y bydd cyfranogwyr yn gweld y sesiynau yn groesawgar, yn addysgiadol ac yn fuddiol.”
Mae’r sesiynau yn agored i unrhyw un sy’n profi perimenopos, menopos neu ôl-menopos, waeth ble maen nhw yn eu taith. Dylid archebu lleoedd ymlaen llaw.
Am fwy o wybodaeth neu i archebu lle am ddim, e-bostiwch socialprescribing@carmarthenshire.gov.uk neu llenwch y ffurflen gofrestru yma (yn agor mewn tab newydd).
