Diolch i roddion hael, mae Elusennau Iechyd Hywel Dda, elusen swyddogol Bwrdd Iechyd Prifysgol Hywel Dda, wedi ariannu therapi gwybyddol ymddygiadol ar gyfer y rhai sy’n profi symptomau menopos wrth gael triniaeth gwrth-ganser ar gyfer canser y fron.

Therapi siarad yw therapi gwybyddol ymddygiadol a all helpu pobl i reoli eu symptomau trwy newid y ffordd y maent yn meddwl ac yn ymddwyn.

Gall symptomau menopos gynnwys gorbryder ac iselder, yn ogystal â symptomau seicolegol a ffisiolegol eraill fel pyliau o wres a chwysu yn y nos, problemau cysgu a blinder. Yn ystod y therapi, gall pobl ddysgu technegau gwahanol i’w helpu i reoli ac ymdopi â’r symptomau hyn.

Dywedodd Linsey Jones, Cydlynydd Oncoleg Acíwt Macmillan: “Rydym yn hynod ddiolchgar bod cronfeydd elusennol wedi caniatáu i ni gymryd rhan yn yr ymyriad therapi gwybyddol ymddygiadol.

“Bydd yr ymyriad o fudd i gleifion sy’n profi sgil-effeithiau annymunol o ganlyniad i’w triniaeth canser a hynny trwy eu cyflwyno i strategaethau hunanreoli, yn seiliedig ar dystiolaeth i fynd i’r afael â symptomau menopos.”

Dywedodd Sally-Ann Rolls, Nyrs Glinigol Arbenigol Oncoleg, Arweinydd Cwrs: “Mae’r cwrs hwn wedi newid bywydau rhai o’n cleifion yn llythrennol. Ni allem ddarparu’r lefel hon o gyfoethogiad heb y cronfeydd elusennol hael iawn a ddarparwyd.”

Dywedodd Nicola Llewelyn, Pennaeth Elusennau Iechyd Hywel Dda, elusen swyddogol Bwrdd Iechyd Prifysgol Hywel Dda: “Mae cefnogaeth ein cymunedau lleol yn ein galluogi i ddarparu gwasanaethau sydd y tu hwnt i’r hyn y gall y GIG ei ddarparu yn nhair sir Hywel Dda a rydym yn hynod ddiolchgar am bob rhodd a gawn.”

I gael rhagor o fanylion am yr elusen a sut y gallwch chi helpu i gefnogi cleifion a staff y GIG yn lleol, ewch i www.hywelddahealthcharities.org.uk