Yn y llun uchod: Dr Simon Fountain-Polley
Mae’r pediatregydd ymgynghorol Simon Fountain-Polley yn dathlu ei ben-blwydd yn 50 oed drwy ymgymryd â 10K Porthcawl a chodi arian ar gyfer Diabetes Pediatrig Hywel Dda a Ward Cilgerran yn Ysbyty Glangwili.
Mae Simon wedi gweithio yng ngorllewin Cymru ers bron i 20 mlynedd fel Pediatregydd Ymgynghorol ac mae’n mynd i Borthcawl ar 5 Gorffennaf i godi arian ar gyfer y gwasanaeth sydd mor agos at ei galon.
Dywedodd: “Rwy’n treulio amser ar ward y plant ac yn gwneud clinigau diabetes pediatrig ar draws y tair sir yn ein hardal bwrdd iechyd. Mae’n fraint i mi weithio ochr yn ochr ag aelodau tîm ymroddedig, gweithgar a gofalgar sy’n darparu cefnogaeth amhrisiadwy i blant agored i niwed a’u teuluoedd.
“Mae fy nghydweithwyr yn aml yn mynd y tu hwnt i helpu teuluoedd, a gall cyllid ychwanegol wneud gwahaniaeth gwirioneddol wrth gefnogi’r ymdrechion hyn. Mae gen i hefyd aelod o’r teulu sy’n byw gyda diabetes math 1, felly mae hwn yn achos sy’n golygu llawer iawn i mi yn bersonol.”
Dywedodd Katie Hancock, Swyddog Codi Arian: “Pob lwc i Dr Simon Fountain-Polley gyda 10k Porthcawl. Diolch am ddefnyddio eich pen-blwydd yn 50 oed fel cyfle i godi arian ar gyfer elusen leol y GIG.
“Nid yw’r rhoddion elusennol hael rydyn ni’n eu derbyn yn disodli cyllid y GIG. Yn hytrach, fe’u defnyddir i ddarparu eitemau a gweithgareddau uwchlaw a thu hwnt i wariant craidd y GIG, megis amgylchedd mwy croesawgar i gleifion, teuluoedd a staff, ac ymchwil i driniaethau a datblygu.”
Helpwch Simon i gyrraedd ei darged codi arian o £500 drwy gyfrannu yma: https://hyweldda.enthuse.com/pf/simon-fountain-polley-rhedeg-run-cilgerran-diabetes
I gael rhagor o fanylion am yr elusen a sut y gallwch helpu i gefnogi cleifion a staff lleol y GIG, ewch i https://hywelddahealthcharities.nhs.wales/
